Ma nafx jekk din l-istorja hix dwar il-ħbieb tal-qalb ta’ Marco u Tina. Jew hix dwar iż-żewġ nani u l-iskarpan, jew dwar Rosa li fi żmien il-gwerra kienet toqgħod fid-dar ta’ Marco. Jew forsi lkoll flimkien qed jidħlu fl-istorja ta’ xulxin.
Min jaf, forsi fl-aħħar mill-aħħar, Greta, oħt Tina, kellha raġun …
Żraben ċkejknin, ħelwin, li twieldu biex ma jintlibsu minn ħadd; li għexu fid-dlam.
Meta z-zija Rebecca wriethom id-dawl ħawduha aktar milli waqt li kienu fid-dlam. U komplew iħawdu lil Marco u lil Tina 40 sena wara!
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
