L-istejjer tas-soltu jkunu stejjer bravi. Jibdew mill-ewwel paġna u jibqgħu sejrin sa l-aħħar. L-istejjer tas-soltu jkollhom bidu wieħed u tmiem wieħed.
Imma din mhix hekk. Din storja mqarba. Il-Fenek l-Aħmar ma jafx x’se jaqbad jagħmel! Ma jafx x’għandu jagħżel!
Trid tkun int li tagħżel x’se jiġri. L-istorja fiha ħafna triqat u int se tagħżel minn liema triqat tgħaddi. Id-destin tal-imsejken Fenek f’idejk.
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
