Għażla ta’ novelli mill-kotba Lubien, Provenz, Sepja, Penumbra, Vespri
Ġirja waħda …
mill-ħelu tas-sugu u l-ġuġù ta’ Nikol ix-Xmaksu, għall-qronfol li jfuħ bla ma jidher …
mit-tkexkix tal-vari mimlijin dmija, għall-qilla ta’ Żaren li fil-purċissjoni tal-Ġimgħa l-Kbira kien jilbes ta’ ċenturjun …
mill-fjuri bbalzmati ta’ Ċelestina, għar-ritratti sepja fl-album tan-nanniet …
Għexieren ta’ karattri minn tlieta u għoxrin novella, miġburin minn medda ta’ għoxrin sena, jingħaqdu bejn dawn iż-żewġ qoxriet biex jawguraw lill-awtur f’għeluq is-sebgħin sena tiegħu.
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
