Dan il-ktieb ġie aġġornat skont is-sillabu l-ġdid tal-Malti, u t-taħriġ kollu fil-ħiliet huwa abbinat mal-Kisbiet mit-Tagħlim (LOs).
Tikka Malti 5b ikompli fejn ħalla Tikka Malti 5a u huwa mmirat għall-istudenti tal-ħames sena tal-primarja. Huwa mfassal b’mod iggradat, b’eżerċizzji mħejjija apposta biex it-tfal jitħarrġu bil-pass tagħhom u biex jiffukaw fuq il-ħiliet indirizzati fis-sillabu — il-qari, il-kitba, it-taħdit u s-smigħ.
Tikka Malti 5b jindirizza wkoll numru ta’ oqsma grammatikali u punti ortografiċi. It-temi kokurrikulari bħall-Paralimpijadi, Malta tal-lum u tal-bieraħ u bosta oħrajn huma magħżula apposta għat-tfal ta’ din l-età u ma jonqosx li jakkumpanjaw it-testi illustrazzjonijiet u ritratti sbieħ, podcasts u riżorsi oħra kif meħtieġ.
Leanne Ellul
leanne ellul tgħallem il-Malti lil żgħażagħ kemxejn kbar. fejn tista’ tikteb b’ittri żgħar għax l-ittri kbar idejquha. ma tikolx annimali u meta ma tikolx il-kelba bil-bews tqatta’ ħafna ħin taqra, tirriċerka jew tikteb. il-kittieba b’xagħarha aħmar (kif kien qalilha darba xi ħadd) tħobb ir-ritratti bojod u suwed. iswed kif tħobb il-kafè. tikteb it-textbooks tikka malti ma’ clare azzopardi, u rebħet il-premju francis ebejer 2013, rebħet il-konkors rumanzi għaż-żgħażagħ 2014, kienet parteċipanta fil-bjennale 2015 u ħadet il-premju speċjali tal-premju tal-ktieb għall-aħjar kittieba emerġenti. bħalissa qed taħdem fuq il-poeżiji tagħha kif ukoll it-tieni rumanz għaż-żgħażagħ.leanneellul.netAra aktar
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
