Edizzjoni aġġornata skont is-sillabu l-ġdid tal-Malti, u t-taħriġ kollu fil-ħiliet huwa abbinat mal-Kisbiet mit-Tagħlim (LOs).
Tikka Malti 5a huwa ktieb ta’ taħriġ fil-Malti mfassal b’mod iggradat u b’eżerċizzji ffukati fuq il-ħiliet indirizzati fis-sillabu — il-qari, il-kitba, it-taħdit u s-smigħ — kif ukoll l-oqsma tal-grammatika, il-punteġġjatura u l-kultura. Fost it-temi li l-istudenti tal-ħames sena se jiltaqgħu magħhom, hemm: is-supereroj, l-ivvjaġġar, id-dinja ta’ madwarna, l-invenzjonijiet u ħafna oħrajn.
L-eżerċizzji f’kull taqsima huma mħejjija apposta biex it-tfal jitħarrġu ftit ftit u bil-pass tagħhom. L-istampi u r-ritratti li jakkumpanjaw l-eżerċizzji ma jonqsux. Il-ktieb huwa wkoll akkumpanjat b’podcasts. Marbutin miegħu hemm ukoll bosta riżorsi oħrajn għall-għalliema u għall-ġenituri sabiex jiggwidaw lill-istudenti fil-kisbiet tal-erba’ ħiliet.
Leanne Ellul
leanne ellul tgħallem il-Malti lil żgħażagħ kemxejn kbar. fejn tista’ tikteb b’ittri żgħar għax l-ittri kbar idejquha. ma tikolx annimali u meta ma tikolx il-kelba bil-bews tqatta’ ħafna ħin taqra, tirriċerka jew tikteb. il-kittieba b’xagħarha aħmar (kif kien qalilha darba xi ħadd) tħobb ir-ritratti bojod u suwed. iswed kif tħobb il-kafè. tikteb it-textbooks tikka malti ma’ clare azzopardi, u rebħet il-premju francis ebejer 2013, rebħet il-konkors rumanzi għaż-żgħażagħ 2014, kienet parteċipanta fil-bjennale 2015 u ħadet il-premju speċjali tal-premju tal-ktieb għall-aħjar kittieba emerġenti. bħalissa qed taħdem fuq il-poeżiji tagħha kif ukoll it-tieni rumanz għaż-żgħażagħ.leanneellul.netAra aktar
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
