Tikka Malti tkompli bil-kotba għar-raba’ sena tal-primarja.
Permezz ta’ Tikka Malti 4a l-istudenti jkomplu jitħarrġu fl-erba’ ħiliet tal-Malti — il-qari, il-kitba, it-taħdit u s-smigħ — imħaddma f’temi differenti. Kull taqsima f’Tikka Malti 4a titlaq minn qawl u tlaqqagħna ma’ karattri fittizji bħal Ċawl Ċawlun, u Damien u Tara, u personaġġi bħal Kristofru Kolombu, Florence Nightingale u Sally Ride. Minbarra l-qari fittizju u mhux fittizju, il-kitba kreattiva u l-eżerċizzji fit-taħdit u s-smigħ, Tikka Malti 4a jindirizza wkoll l-oqsma tal-grammatika u l-kultura f’kuntest.
Il-ktieb huwa akkumpanjat b’podcasts ta’ taqbiliet, stejjer, djalogi u intervisti, fost l-oħrajn. L-għalliema u l-ġenituri għandhom ukoll aċċess għal numru ta’ riżorsi utli.
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
Leanne Ellul
leanne ellul tgħallem il-Malti lil żgħażagħ kemxejn kbar. fejn tista’ tikteb b’ittri żgħar għax l-ittri kbar idejquha. ma tikolx annimali u meta ma tikolx il-kelba bil-bews tqatta’ ħafna ħin taqra, tirriċerka jew tikteb. il-kittieba b’xagħarha aħmar (kif kien qalilha darba xi ħadd) tħobb ir-ritratti bojod u suwed. iswed kif tħobb il-kafè. tikteb it-textbooks tikka malti ma’ clare azzopardi, u rebħet il-premju francis ebejer 2013, rebħet il-konkors rumanzi għaż-żgħażagħ 2014, kienet parteċipanta fil-bjennale 2015 u ħadet il-premju speċjali tal-premju tal-ktieb għall-aħjar kittieba emerġenti. bħalissa qed taħdem fuq il-poeżiji tagħha kif ukoll it-tieni rumanz għaż-żgħażagħ.leanneellul.netAra aktar
