Edizzjoni aġġornata skont is-sillabu ġdid tal-Malti, u t-taħriġ kollu fil-ħiliet huwa abbinat mal-Kisbiet mit-Tagħlim (LOs)
Tikka Malti 3a u Tikka Malti 3b huma ż-żewġ kotba fit-tielet livell, għat-tielet sena tal-primarja.
Tikka Malti 3a huwa mqassam f’temi u permezz ta’ kull tema l-istudenti jitħarrġu fil-ħiliet indikati fis-sillabu, jiġifieri fil-qari, fil-kitba, fit-taħdit u fis-smigħ. Huwa permezz tal-ħiliet li t-tfal jitħarrġu fl-oqsma tal-grammatika u l-kultura, fost l-oħrajn. Insibu siltiet fittizji u mhux fittizji akkumpanjati minn eżerċizzji varji, minn materjal supplimentari u podcasts.
Kemm it-taħriġ il-fehem kif ukoll il-kitba kreattiva huma ggradati, ippreżentati mill-eħfef għall-itqal biex it-tfal jitjiebu fis-suġġett bil-pass tagħhom. Dan il-ktieb huwa għodda pedagoġika unika mfassla fid-dawl tas-sillabu l-ġdid.
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
Leanne Ellul
leanne ellul tgħallem il-Malti lil żgħażagħ kemxejn kbar. fejn tista’ tikteb b’ittri żgħar għax l-ittri kbar idejquha. ma tikolx annimali u meta ma tikolx il-kelba bil-bews tqatta’ ħafna ħin taqra, tirriċerka jew tikteb. il-kittieba b’xagħarha aħmar (kif kien qalilha darba xi ħadd) tħobb ir-ritratti bojod u suwed. iswed kif tħobb il-kafè. tikteb it-textbooks tikka malti ma’ clare azzopardi, u rebħet il-premju francis ebejer 2013, rebħet il-konkors rumanzi għaż-żgħażagħ 2014, kienet parteċipanta fil-bjennale 2015 u ħadet il-premju speċjali tal-premju tal-ktieb għall-aħjar kittieba emerġenti. bħalissa qed taħdem fuq il-poeżiji tagħha kif ukoll it-tieni rumanz għaż-żgħażagħ.leanneellul.netAra aktar
