Min kien qed jisraq il-ful mill-għalqa tal-ġganta? L-għaliex dawk kollha li marru jfittxu l-Għasfur li jgħanni qatt ma ġew lura aktar?
Kif irnexxielu ż-żagħżugħ jeħles lix-xwejjaħ missieru minn ġod-dalma tal-għar?
Xi ġralha l-prinċipessa li żżewġet żagħżugħ bi snienu tad-deheb?
Fejn kienu joqogħdu l-ġganti li serqu t-tiġieġa u s-serduk tat-tifel?
Jista’ qatt ikun li l-mejjet imexxi lill-ħaj?
Din il-ġabra ta’ għaxar ħrejjef folkloristiċi Maltin teħodna f’dinja maġika fejn il-ġganti u sħaħar jgħammru tefgħa ta’ ġebla ’l bogħod, fejn wara ħafna taqtigħ il-qalb jirnexxilek tikseb l-imħabba ta’ prinċipessa sabiħa … dinja fejn it-tajjeb jirbaħ u l-ħażin jieħu li ħaqqu.
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
Lil Ġorġ Mallia jagħrfuh mit-tbissima. Jgħidu li dejjem jitbissem, imma fil-fatt, kultant jikteb xi ktieb għat-tfal ukoll (u jpenġi l-istampi fih hu stess), u kultant ikun il-kap tad-Dipartiment tal-Midja u l-Kommunikazzjoni tal-Università ta’ Malta, fejn għandu l-kariga ta’ Professur Aggregat. U xi kultant issibu wkoll jaqra (jew ipinġi) xi komik jew tnejn. L-hena tiegħu jpinġi u jirriċerka, u ma jħobb xejn aktar mill-kwiet … u l-arja friska.
