Stilel 6 hu mimli stejjer maġiċi, oħrajn informattivi, stejjer tad-daħk u oħrajn ftit inqas tad-daħk, leġġendi Maltin u oħrajn Ewropej.
Dan il-ktieb fih ukoll eżerċizzji interessanti li jgħinuk tħaddem l-immaġinazzjoni tiegħek. Tista’ tingħaqad għall-aħħar darba ma’ Tepp u Tipa u taqra ħafna, tikteb ħafna, titħaddet ħafna, tisma’ ħafna u taħdem eżerċizzji grammatikali wkoll. Tibża’ xejn! M’hawn xejn tad-dwejjaq f’dan il-ktieb. Anzi, fih se tiltaqa’ żgur ma’ ħafna karattri simpatiċi.
Jekk trid tkun taf min kien Mikiel Anton Vassalli u għaliex weħel il-ħabs, min kienu Żgugina u n-nanna Spina, iftaħ dan il-ktieb, ibda aqra u aħdem dak li jgħidulek Tepp u Tipa.
Ħu gost!
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
Clare Azzopardi tgħix ġo dar antika 400 sena. Tqatta’ ħafna ħin taqra u tikteb l-istejjer kemm għat-tfal kif ukoll għall-kbar, sakemm ma tkunx qed tgħallem. Hija l-Kap tad-Dipartiment tal-Malti fil-Junior College. Rebħet ħafna premjijiet bil-kotba tagħha u ħafna mix-xogħol tagħha ġie maqlub f’lingwi oħra. clareazzopardi.comAra aktar
