L-attivitajiet ta’ Stilel 4 għandhom jgħinuk fit-tagħlim tal-Malti. Dan il-ktieb huwa mimli stejjer, ħrejjef, eżerċizzji marbuta mal-kitba u mal-kultura, logħob marbut mal-grammatika, u bosta attivitajiet oħra li lilek jistgħu jgħinuk tissaħħaħ fil-lingwa Maltija.
Bħas-snin l-ohra, Tepp u Tipa se jerġgħu jkunu miegħek u jekk ma jkunux ta’ għajnuna biżżejjed, tinsiex li hemm l-għalliema tiegħek, il-ġenituri, ħutek il-kbar, in-nanniet u z-zijiet.
Mela ħu din l-opportunità u ibda ilgħab il-logħob li hemm f’dan il-ktieb u ara kemm jirnexxilek iġġemma’ stilel.
Ħu gost!
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
