Ħafna drabi, meta t-tfal jagħmlu xogħol tajjeb u pulit, l-għalliema jagħtuhom stilla. Aħna nittamaw li bis-saħħa ta’ din is-sensiela, it-tfal jirnexxilhom jakkwistaw mhux stilla waħda, imma ħafna.
L-għan ta’ dawn il-kotba huwa li t-tagħlim jiġi ppreżentat f’forma ta’ logħba, biex it-tfal jitgħallmu waqt li jieħdu gost. Kull ktieb jorbot ma’ ta’ qablu u jħejji t-triq għal ta’ warajh, b’hekk tinħoloq katina waħda li bil-mod il-mod twassal lit-tfal sas-sitt sena tal-iskola primarja.
Nittamaw li dawn il-kotba jkomplu jħeġġu l-kreattività tat-tfal u li l-għalliema jużawhom bħala l-punt tat-tluq għal xogħol usa’.
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
