B’din il-ġabra ta’ stejjer qosra ġodda ta’ Żahra, tħossok qed tidħol fil-ħin tas-sjesta, meta taħt is-sħana u l-qilla ta’ xemx sajfija, il-ħajja titħeddel u torqod. Imbagħad, meta tistenbaħ wara siegħa mistrieħ, issib li x-xemx naqqset mis-sirġa tagħha … u l-ħolm kollu li ħlomt, tkun tista’ tkomplih b’għajnejk miftuħin.
Ma nafux jekk Grampanja kienx jeżisti tassew. U lanqas ma nafu l-għaliex hawn min jibża’ minn idejh u mill-iskeletru tiegħu stess. U tgħid it-tfajla tal-mantilla għad issib paċi u mistrieħ pinġuta fl-inkwatru?
U kif inhi din li Freddie Borg kien jixtri kemm kotba jara b’għajnejh biex jaqra minnhom ftit paragrafi biss?
Sjesta għandu mnejn jagħtik it-tweġibiet kollha … jew idaħħlek f’dubji akbar!
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
“F’dan il-ktieb inħoss li qrajt uħud mill-isbaħ metafori ta’ Trevor Żahra. Friski bħat-taħrika li jqanqal ir-riħ … Trevor Żahra jerġa’ jikxef il-ħila tiegħu ta’ kittieb tal-istejjer realistiċi maġiċi. Il-ħolm, bħal fi stejjer f’kotba qabel dan, jerġa’ jkun il-mutur li permezz tiegħu l-istejjer jaqbżu minn dimensjoni għal oħra.
“Lilkom nistedinkom tiftħu l-ktieb u taqrawh. Imma qabel, ixxommuh. Ħa jitqanqlilkom riefnu. Ħa tifhmu għaliex dan hu Sjesta bla ma hu sjesta: għax sjesta rqad, għax sjesta ħolm, għax sjesta l-waqt meta daqt ikunu se jdoqqu l-erbgħa ta’ waranofsinhar, id-dar.”
— Leanne Ellul waqt it-tnedija ta’ Sjesta: ilma żahar, irjieħ u djar
