Il-ħġieġ tal-antiporta tan-nanna kien irrigat fit-tul. Qabel ma nħabbat u niftaħ kont inħobb inkaħħal għajnejja miegħu u nittawwal ‘il ġewwa. Is-sottospekkju tal-intrata, il-gastri, il-ħnejja tat-taraġ … kollox kien jidher immewweġ u distort. Anki n-nanna Ċens, bilqiegħda faċċata u silwettata kontra d-dawl tal-bieb tal-bitħa, minn wara l-ħġieġ irrigat tal-antiporta kienet tidher tikwida bħar-riflessi f’wiċċ il-baħar u ma’ kull ċaqliqa tiegħi kienet titbandal u ċċafċaf, ankrata mal-mejda tal-ikel ġol-menqa kennija tagħha bejn il-vetrina u s-sideboard.
Imbagħad niftaħ l-antiporta u nsib ruħi ġo baħar ta’ stejjer!
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
