Din l-istorja ta’ Noè (u anke Masu) tintroduċina għad-dinja ta’ tifel bl-ADHD. Fil-ktieb, Ben jgħidilna l-istorja ta’ Noè. Noè tifel fuq tiegħu, mimli enerġija u allegrija. Noè jħobb lil Masu tgħidx kemm … u l-ħalib u l-imħaded komdi wkoll. Kollox ikun sejjer sew sakemm darba waħda jmorru kamp. X’jagħmel waqt il-kamp Noè? U x’jiġri meta d-darba ta’ wara ma jistednuhx għall-kamp? U kif isolvuha dil-biċċa?
L-ADHD mhux tikketta xi nwaħħlu fuq it-tfal, imma realtà li hi biss parti minn dak li jagħmilhom min huma.
Noè u l-iskojjattlu bla kwiet huwa l-ewwel ktieb f’sensiela ġdida Lenti fuq … li tuża l-format ta’ storja ħelwa, umoristika biex turi x’inhi l-veru inklużjoni.
Noè mhuwiex tant, biss, għal tfal b’ADHD daqskemm għat-tfal KOLLHA biex tramite l-istorja naraw kif tfal b’ADHD huma tfal bħalna, bl-istess xewqat u affarijiet li jdaħħquhom u gost bl-istess avventuri u ħarġiet.
Leanne Ellul
leanne ellul tgħallem il-Malti lil żgħażagħ kemxejn kbar. fejn tista’ tikteb b’ittri żgħar għax l-ittri kbar idejquha. ma tikolx annimali u meta ma tikolx il-kelba bil-bews tqatta’ ħafna ħin taqra, tirriċerka jew tikteb. il-kittieba b’xagħarha aħmar (kif kien qalilha darba xi ħadd) tħobb ir-ritratti bojod u suwed. iswed kif tħobb il-kafè. tikteb it-textbooks tikka malti ma’ clare azzopardi, u rebħet il-premju francis ebejer 2013, rebħet il-konkors rumanzi għaż-żgħażagħ 2014, kienet parteċipanta fil-bjennale 2015 u ħadet il-premju speċjali tal-premju tal-ktieb għall-aħjar kittieba emerġenti. bħalissa qed taħdem fuq il-poeżiji tagħha kif ukoll it-tieni rumanz għaż-żgħażagħ.leanneellul.netAra aktar
Stephanie Bugeja
Stephanie Bugeja hija Psikologa fl-ambitu tal-Edukazzjoni. Preżentement qegħda tirriċerka għal Ph.D. fejn qed tindaga dwar il-vuċi tat-tfal. Hija wkoll lecturer fil-Psikoloġija kemm fil-livell post-sekondarju kif ukoll l-Università ta’ Malta. Ara aktar
