L-istess bħalek u bħali, ġol-fond ta’ qalbha, Marika kellha ħafna xewqat. Imma qatt ma tat kashom iżżejjed … sakemm … għodwa waħda, fil-ħanut tan-nanna Annie, daħlet mara b’ħarsa niffieda li talbitha minċott ħajt iswed.
Dak il-lejl ix-xewqat kollha telgħu fil-wiċċ. Bdew itektkulha wara l-bieb biex tiftħilhom. U Marika ntebħet kemm kienet faċli li dawn ix-xewqat isiru realtà. Imma ma damitx ma ntebħet li fil-ħajja xejn mhu daqstant faċli.
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
