Ir-ritorn ta’ Clare Azzopardi b’picture book ġdid fjamant!
Madame Ortensja Paskwalina de Rohan kienet ħajjata prima. Kienet l-aktar magħrufa għall-kostumi tal-Karnival. Tgħidx kemm ħietet tul ħajjitha!
Il-Karnival kienet tħobbu ħafna imma ma kinitx tmur għax il-folol kienu jdejquha u anki dak il-ħafna ġenn u storbju. Minflok, kienet tarah mill-gallarija flimkien man-neputija tagħha, Pissiperla.
Imbagħad darba waħda, Madame fettlilha tħit żewġ kostumi: wieħed għaliha u l-ieħor għal Pissiperla. U flimkien marru l-Karnival …
Proġett kofinanzjat mill-Aġenzija Nazzjonali tal-Litteriżmu
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
“Dan il-ktieb hu fost l-iktar picture books imlewna li Azzopardi ħarġet s’issa. U bir-raġun għax il-Karnival hu xalata ta’ kuluri u briju … Clare Azzopardi jirnexxilha żżewweġ l-element ferrieħi li jġib miegħu l-Karnival mal-eperjenza qarsa u tad-dwejjaq tal-mewt. Il-Karnival assoċjat mal-bluha, ix-xalar u t-tgawdija, jinbidel għal Madame għax ‘L-isfilata tħobb taraha mill-gallarija. Ħafna drabi waħedha, u kultant man-neputija.’ Għalhekk il-Karnival isir avveniment li hi u Pissiperla jaraw flimkien minn ġo dar Madame. Jinħoloq dan id-distakk bejn il-parteċipazzjoni diretta fil-Karnival innifsu, il-ferħ ta’ Pissiperla u l-wiċċ imqarras ta’ Madame f’dan iż-żmien. Imma xi jġiegħel lil Madame, li tant ħietet kostumi tal-Karnival u libset minnhom, li ssir daqshekk xettika biex tmur issewgi mit-toroq il-Karnival?”
— Reċensjoni minn Elena Cardona fl-ILLUM: Kostumi, perlini u kuluri
