Ħafna drabi l-okkażjonijiet li naqraw dwar il-ħajja tal-Maltin tad-djaspora huma ftit. Dan il-ktieb jiġbor fih esperjenzi u realtajiet għalkollox differenti minn tagħna. Huma narrattivi ta’ sorijiet, qassisin u lajċi Maltin li ilhom snin twal jgħixu fl-Art Imqaddsa u lil hinn. Uħud minnhom, bħal Sister Antonia Agius, telqu minn Malta fuq ajruplan tal-gwerra u ilhom hemm mill-1945.
L-Art tal-Kliem joffri mumenti diffiċli, umli, skomdi, sempliċi, umoristiċi, imnikkta mill-ħajja ta’ 31 Malti u Maltija li għoġobhom jilqgħuna għandhom biex jirrakkontawlna dwar il-ħidma sfiqa tagħhom. Nittamaw li permezz tiegħu qed niftħu tieqa ċkejkna sabiex intom ukoll, bħalna, tkunu tistgħu tesperjenzaw il-mod kif il-Maltin jgħixu barra minn pajjiżhom.
Din il-pubblikazzjoni kienet kofinanzjata mill-Fond għad-Diplomazija Kulturali fi ħdan il-Ministeru għall-Affarijiet Barranin, u mill-APS Bank.
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
Nathalie Grima
Nathalie Grima għandha Masters fis-Soċjoloġija mill-Università ta’ Malta. Ir-riċerka tagħha ffukat fuq it-transnazzjonaliżmu politiku fost ir-residenti barranin ġewwa Malta, li huma migranti tal-ewwel ġenerazzjoni minn pajjiżi Nord-Afrikani u tal-Lvant Nofsani. Preżentement qed taħdem mal-Fondazzjoni għal Servizzi ta’ Ħarsien Soċjali bħala aġent għall-iżvilupp reġjonali tal-LEAP tar-reġjun tat-Tramuntana. Tħobb issiefer lejn bnadi fejn tista’ tiskopri u tgawdi esperjenzi kulturali differenti.
