Meta Ktieb ix-Xwejjaħ ħareġ għall-ewwel darba fl-1987, kien il-pijunier tal-kitba fantastika bil-Malti. Din edizzjoni riveduta, b’taħlita ta’ tpinġijiet mill-oriġinal u oħrajn ġodda minn Ġorġ Mallia, issa f’idejkom għall-ewwel darba wara ħafna snin.
Fih hemm il-ġrajja tal-Viżjier tal-belt fantastika ta’ Terani, li jfittex ktieb imsaħħar li permezz tiegħu jkun jista’ jsalva dinjitu mid-dlamijiet li ġabu fuqha s-sħaħar ħżiena ta’ Ermerat, l-art ’il fuq mis-sħab.
Niltaqgħu mas-saħħar apprentist Rejnon, is-Sultan twajjeb Abadnari, l-aljen bennej tal-muntanji, il-kavallier qalbieni, Melas il-mexxej tas-sħaħar tajba, u Erdon, il-mexxej ta’ dawk ħżiena. Dawn u tant oħrajn, flimkien ma’ ħlejjaq fantastiċi, jimlew id-dinja ta’ Ktieb ix-Xwejjaħ b’seħer uniku.
Ġorġ Mallia
Lil Ġorġ Mallia jagħrfuh mit-tbissima. Jgħidu li dejjem jitbissem, imma fil-fatt, kultant jikteb xi ktieb għat-tfal ukoll (u jpenġi l-istampi fih hu stess), u kultant ikun il-kap tad-Dipartiment tal-Midja u l-Kommunikazzjoni tal-Università ta’ Malta, fejn għandu l-kariga ta’ Professur Aggregat. U xi kultant issibu wkoll jaqra (jew ipinġi) xi komik jew tnejn. L-hena tiegħu jpinġi u jirriċerka, u ma jħobb xejn aktar mill-kwiet … u l-arja friska.
“U issa wara 36 sena, dan il-ktieb li għandu ismu mnaqqax fil-kanonu tal-letteratura Maltija twieled mill-ġdid … Ktieb ix-Xwejjaħ huwa parti importanti fl-istorja tal-ktieb Malti u għalhekk għandu jkollu post speċjali f’kull librerija — pubblika, tal-iskola u ġod-dar.” — Reċensjoni fil-KullĦadd 02.04.2023
“Ktieb ix-Xwejjaħ is considered to be the first fully-fledged high fantasy book ever published in Maltese … this book has become a classic since its initial publication. There is the quest, of course, which is at the core of most works of fantasy, ranging from Homer’s Odyssey to Tolkien’s Lord of the Rings. There is a mythology created by the author, and the story often takes the form favoured by the Sword and Sorcery tradition made popular in the early 20th century.
“It is a book full to brimming with a wild imagination and an enchantment that will stay with its readers for a very long time.” — Reċensjoni fil-Malta Independent on Sunday 05.03.2023: Pioneering fantasy
“Il-qarrej attent jinduna li l-istruttura tal-kapitli-rakkonti tieħu l-forma ta’ dar magħmula minn ħafna swali jmissu ma’ xulxin b’bieb ta’ waħda li jiftaħ biex tgħaddi għal ta’ warajha u ta’ warajha, kamra wara l-oħra, rakkont wara l-ieħor. Dak li jiġi rrakkontat fit-tieni parti bħal jintegra mal-partijiet frammenti li nqraw fl-ewwel parti, b’ċerti personaġġi jerġgħu jidhru fit- tieni parti, bħal Rejnon, is-saħħar żagħżugħ li għeb fl-ewwel parti biex jerġa’ jinstab fit-tieni parti …
“… naċċertakom li dan hu ktieb li saħħarni tant li qrajtu kważi f ’nifs wieħed.”
— Reċensjoni minn Patrick Sammut fl-ILLUM 30.07.2023: Kliem ix-xwejjaħ fi ktieb
