Dan il-ktieb huwa l-gwida definittiva għat-tħaddim tal-ħila tal-kitba fil-klassijiet tas-sekondarja. Fih issib l-għodda kollha neċessarja sabiex tikteb kitba tajba, hi ta’ liema ġeneru hi. Hawnhekk m’intix se ssib biss kampjuni ta’ kif għandha tidher jew titqassam il-kitba tiegħek, iżda serje ta’ eżerċizzji prattiċi li biċċa biċċa jiggwidawk lejn kitba sħiħa b’suċċess.
L-eżerċizzji u l-kampjuni f’kull kapitlu joffru sfida lil individwi b’ħiliet varji, bl-għan li jrawmu f’kulħadd kunfidenza fil-ħila tal-kitba. Dan il-ktieb jagħmilha faċli għall-ġenituri daqskemm għall-għalliema sabiex jiggwidaw lill-istudenti.
Dawk l-istudenti li jixtiequ jipprattikaw iżjed il-ħila tal-kitba b’mod indipendenti, issa jistgħu wkoll grazzi għall-eżerċizzji gradati.
Clifford Jo Zahra
Clifford Jo Żahra, għalliem tal-Malti fil-livell sekondarju, huwa awtur ta’ Linji Sfużi (2014) u ta’ diversi xogħlijiet letterarji li dehru f’rivisti letterarji. In-novella tiegħu Tlett Ijiem u Wieħed kienet waħda mill-finalisti tal-proġett Flash Europa 28, u ġiet tradotta għall-Ingliż u ċ-Ċiniż. Matul is-snin kien involut fil-koordinazzjoni ta’ numru ta’ proġetti artistiċi fosthom Linji Sfużi (2014) u Daqqa t’Id (2016); kien elett fil-kumitat tal-Għaqda tal-Malti-Università (2013-2015); ippreżenta seminars u taħditiet ta’ natura lingwistika jew letterarja; u kiteb għadd ta’ kontenut u intervisti għal siti u rivisti varji. Ara aktar
Shanna Spiteri
Shanna Spiteri għalliema tal-Malti fil-livell sekondarju. Ġiet eletta fil-kumitat tal-Għaqda tal-Malti—Università (2018-2020). Iggradwat mill-Università ta’ Malta fl-2013 b’Baċellerat tal-Arti fil-Malti (Unuri), fl-2014 bħala għalliema u fl-2017 bħala qarrejja tal-provi. Minbarra l-imħabba lejn il-lingwa u l-letteratura Maltija, għandha għal qalbha wkoll l-ivvjaġġar, il-qari u r-riċerka bijografika. Ara aktar
