Ktieb ta’ taħriġ il-fehem għas-sitt sena tal-primarja
Jekk int fis-sitt sena tal-primarja, dan il-ktieb huwa kollu kemm hu għalik. Ktieb li se jgħinek ittejjeb il-ħiliet tal-qari u tal-fehem. Fih se ssib 20 silta li qed jistennewk taqrahom. Hemm eżerċizzji differenti marbuta magħhom, fosthom: Veru jew Falz, Fisser, Imla l-Vojt, Wieġeb u Sib Kelma Oħra Flok.
Is-siltiet inkitbu minn awturi differenti u allura kollha għandhom l-istil partikolari tagħhom. Fost l-awturi hemm Trevor Żahra, Lillian Sciberras, Rita Saliba, Pierre J. Mejlak u ħafna oħrajn. Huma siltiet friski u eċitanti, eżatt kif jogħġbu lilek. Uħud mis-siltiet huma fittizji, filwaqt li oħrajn mhumiex fittizji.
Dan il-ktieb se jgħinek tħaddem il-kapaċitajiet tiegħek tal-qari, tifhem dak li qed taqra, twieġeb il-mistoqsijiet fuq dak li tkun qrajt, u jekk jinteressak is-suġġett, hemm ukoll sezzjoni li tħeġġek tfittex, taħseb, tiddiskuti u tikteb iktar dwaru.
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
