Ktieb bl-istampi li bid-delikatezza li jafu jsawru biss id-duo Clare Azzopardi/Lisa Falzon jesplora mat-tfal l-imħabba, l-età u l-firda u t-telfien — kollox imdawwar mid-dinja misterjuża u affaxxinanti tal-qtates … il-qtates ta’ max-xatt
In-nanna u n-nannu jmorru jagħtu l-ikel lill-qtates ta’ max-xatt kuljum preċett. Ma jfallux ġurnata. Trid tarahom sejrin bil-bagalja antikalja mimlija ikel!
Imma darba waħda, in-nanna u n-nannu ma jmorrux … il-qtates jibqgħu jistennew u jistennew u jistennew … tgħid se jibqgħu bil-ġuħ?
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar