Avventura ġdida għat-tfal mill-pinna ta’ Ġorġ Mallia
“Kont naf biss li jismu l-Professur Għasfur … Li naf hu li dħalt f’biċċa tinkiteb minħabba fih. Storja ta’ avventura li qatt ma immaġinajt li se ngħaddi minnha. Periklu kbir. Twerwir. Meravilji. Ħlejjaq li jaqtgħuk minn sidrek bil-biża’! Imma wkoll ġrajjiet ta’ ferħ li bħalu qatt ma ħassejt f’ħajti.”
Hekk tibda l-istorja tagħha Katrin, tifla ta’ ħdax-il sena, kurjuża u intelliġenti, meta tiltaqa’ mal-Professur Għasfur. Dan il-ġenju misterjuż u l-fekruna tiegħu sabu mod kif jivvjaġġaw bejn id-dimensjonijiet. U bi żball Katrin tispiċċa magħhom.
Ġorġ Mallia
Lil Ġorġ Mallia jagħrfuh mit-tbissima. Jgħidu li dejjem jitbissem, imma fil-fatt, kultant jikteb xi ktieb għat-tfal ukoll (u jpenġi l-istampi fih hu stess), u kultant ikun il-kap tad-Dipartiment tal-Midja u l-Kommunikazzjoni tal-Università ta’ Malta, fejn għandu l-kariga ta’ Professur Aggregat. U xi kultant issibu wkoll jaqra (jew ipinġi) xi komik jew tnejn. L-hena tiegħu jpinġi u jirriċerka, u ma jħobb xejn aktar mill-kwiet … u l-arja friska.