Maia u Alex lesti u eċitati għat-tieni missjoni tagħhom bħala Vinkulari. Jum il-vinkulazzjoni kważi wasal, imma ftit ġranet qabel jitfaċċa Montego, ħabib antik tal-papà li qed jinvestiga dak li ġara fl-aħħar minuti tal-ewwel vjaġġ li għamlu fl-1942 — meta xi ħadd kien rahom jivvjaġġaw.
Fl-aħħar it-tfal imorru fil-passat biex jibdew il-missjoni l-ġdida f’Malta ta’ kważi 500 sena ilu. Hemm jibdew jindunaw li jeżistu ħafna sigrieti marbutin magħhom, mad-dinja tal-Vinkulari u ma’ muftieħ antik … sigrieti li jfixklu lil Alex u ’l Maia milli jerġgħu lura fil-preżent.
Simone Spiteri
Simone Spiteri bdiet tikteb id-drammi (qosra u fuq typewriter imkissra li sabet taħt it-taraġ tan-nanna) meta kienet għadha tifla żgħira. Minn dak iż-żmien l’hawn kompliet taħdem u tikteb għat-teatru u tgħallem studenti ta’ kull età. Ftit tas-snin ilu bdiet tikteb ukoll textbooks tal-Istorja u riċentament (wara ħafna snin) għamlet ftit kuraġġ u kitbet l-ewwel ktieb tagħha li biex jieħu l-ħajja m’għandux bżonn atturi, rehearsals u ħafna ġimgħat bla rqad.
