L-ewwel ktieb Merlin li juża r-Realtà Miżjuda (Augmented Reality)
Imma tgħid min qatlu lis-Sur Spir?
Le ħej … ara ma twaħħlux fija. Jien sempliċement ktibt l-istorja u m’għandi x’naqsam xejn. Għax ma tmorrux tistaqsu lis-seftura li sabitu mejjet, jew lil dak in-nofs ras ta’ Nardu tal-ħalib, jew lis-Sinjorina Rebecca Sammut, li dejjem dieħla u ħierġa għandu? Il-lista twila ġmielha.
X’inhu? Qtiltu jien għax ktibt l-istorja? Mela iftħu l-bieb tal-kamra u idħlu … u ppruvaw solvu l-misteru intom.
Dan il-ktieb juża t-teknoloġija tar-Realtà Miżjuda (Augmented Reality) biex tkun tista’ tarah jieħu l-ħajja quddiemek!
L-istruzzjonijiet biex tniżżelu tħaddem l-app issibhom ġol-ktieb. L-app hija mwassla minn Flint Innovations Ltd, Malta.
Trevor Żahra
Trevor Żahra fettillu jitwieled fis-16 ta’ Diċembru 1947. Ma nafux jekk hux veru li kiteb l-ewwel rumanz tiegħu meta kellu xahrejn! Hu x’inhu, aktar faċli tipprova ssib x’ma kitibx, milli x’kiteb: stejjer għat-tfal, workbooks, poeżiji, rumanzi, novelli, drammi, monologi. U x’ma pinġiex? Biżżejjed insemmu Stampakelma li għalih pinġa ’l fuq minn elf stampa. S’issa diġà għandu kotba ppubblikati Franza, ir-Russja u n-Norveġja. trevorzahra.com
