Studju kritiku dwar id-dramm Karnival ta’ Francis Ebejer
Dan l-istudju kritiku għandu jgħin lill-istudenti li qegħdin jistudjaw id-dramm Karnival ta’ Francis Ebejer bi preparazzjoni għall-eżami tal-Malti fil-livell avvanzat. Hija rarità li naqraw dramm għax is-soltu nippreferu narawh irreċtat. Imma jien u nikteb dan l-istudju immaġinajtni l-ħin kollu qed nara l-karattri jirreċtaw quddiemi. U ppruvajt inwassal din l-istess emozzjoni lill-qarrejja li se jkunu qed jistudjawh, janalizzawh u eventwalment jinterpretawh skont dak li l-karattri jgħidulhom.
Jinkludi sezzjonijiet dwar:
• id-drammi ta’ Francis Ebejer
• il-karattri tad-dramm
• analiżi tat-tliet atti
• temi
• il-komponimenti
• iċ-ċekkjatur
• mistoqsijiet ġenerali
• intervista mal-“Maskerat”
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
