Ana u Zak jgħixu f’futur fejn id-Dinja tagħna spiċċat kollha bini, mingħajr siġar, fjuri jew ġonna. Issa tiġrilhom waħda tinkiteb: imorru jinvestigaw xi ħaġa kurjuża fl-iktar triq antika u abbandunata tal-belt. U hemm jiskopru xi ħaġa meraviljuża, li ma titwemminx! Huma jaħsbu li aħjar iżommuha sigrieta, li ma jmorrux jiġu fl-inkwiet. Iżda dak li skoprew ma jridx jibqa’ moħbi, u meta Ana u Zak isuqu l-iscooters lura lejn id-dar, jindunaw li mhumiex waħedhom, u li issa xejn mhu se jibqa’ l-istess!
Ktieb li juża l-font EasyReading, tipa b’leġġibbiltà faċli, ta’ għajnuna għal tfal bid-dislessja.
Audrey Friggieri
Ħafna ma jobsrux li Audrey Friggieri tikkomunika mas-saħħara personali tagħha fil-forma ta’ qattusa, tkellem lill-pjanti, taqra ossessivament u hi ffissata f’li tfittex teżori moħbija. Tħobb tgħum, timxi fix-xita, speċjalment ħdejn il-baħar, u tħares lejn is-sema ċar billejl bit-tama li jaslilha xi sinjal minn “hemm barra”. Spiss issibha b’tazza nbid f’idha, jew inkella tiġri jew tilgħab it-tennis. Imma temmen li kull tant żmien tajjeb li tagħmel xi ħaġa tal-biża’.
