1.mt huwa l-ewwel ktieb fis-serje .mt – magħmul apposta għall-istudenti tal-ewwel sena fis-sekondarja.
Kull taqsima f’dan il-ktieb titlaq dejjem minn storja li minnha joħorġu l-mistoqsijiet għar-riflessjoni u għad-diskussjoni. L-istejjer differenti għandhom jgħinu lill-istudenti fil-ħiliet tal-qari, tat-taħdit, tas-smigħ u tal-kitba, kif ukoll iqajmu l-interess għall-għarfien kulturali, grammatikali u ortografiku. Permezz ta’ dan il-ktieb l-istudenti jistgħu jżommu portfoljo bil-kitbiet tagħhom, bil-poeżiji, bil-mistoqsijiet u t-tweġibiet, bir-riċerka dwar topiks varji, bl-eżerċizzji grammatikali, bir-riflessjonijiet u l-ideat tagħhom rigward it-tagħlim tal-lingwa.
1.mt għandu jgħin lill-istudenti jaħsbu b’mod kritiku fuq dak li jaqraw, jiddiskutu, jagħtu l-opinjonijiet tagħhom, jiktbu u jieħdu gost fil-klassi tal-Malti.
Clare Azzopardi
Wara 25 sena tgħallem il-letteratura Maltija, Clare Azzopardi ddeċidiet li titlaq kollox u tibda kapitlu ġdid. Ma tafx kemm se jkun twil dal-kapitlu, u lanqas jimpurtaha wisq dment li qed tiktbu hi. L-importanti li magħha hemm Albert, karattru importanti ħafna fl-istorja ta’ ħajjitha; l-importanti li hemm il-kotba tal-kittieba li tħobb (sintendi ma tistax iġġorrhom kollha, imma ġa ġarret ħafna); l-importanti li hemm is-siġar ħodor u kbar qishom ġganti; ir-russetti u ċ-ċikonji bla ebda biża’ li jaqilgħu tir; l-importanti li hemm is-skiet u ftit li xejn krejnijiet.
clareazzopardi.comritratt meħud minn Giola CassarAra aktar
