Xi tkun l-aħħar tas-sena mingħajr lista tal-aktar popolari? U fil-każ tagħna, ħtafna l-opportunità biex naraw ftit l-aktar 10 kotba Merlin li nbigħu dis-sena. Fl-istess waqt, nirringrazzjaw lill-qarrejja kollha talli anki f’din is-sena pjuttost “differenti” ssapportjajtu lill-ktieb Malti, lill-awturi, illustraturi, edituri, qarrejja tal-provi … u lil kull min ikun involut biex isir ktieb Malti!
Intant, hawn huma:
Wieħed mill-ftit kotba bl-Ingliż li nippubblikaw, dan il-picture book ta’ Aunty Sab b’illustrazzjonijiet ta’ Emma Galea Naudi, seraq il-qlub ta’ ħafna tfal u tal-ġenituri tagħhom li wżaw il-ktieb biex jitkellmu dwar l-emozzjonijiet kollha li ngħaddu minnhom fil-ħajja ta’ kuljum.
M’hemmx x’tara, jgħaddi kemm jgħaddi żmien, u jikbru kemm jikbru ġenerazzjonijiet ġodda, Mastru Gerfex jibqa’ wieħed mill-aktar karattri fittizji maħbuba u li jaf idaħħaq u jnissel tbissima. Carmel G. Cauchi dis-sena rritorna b’ġabra ta’ stejjer u praspar ġodda ta’ Gerfex, ma jistax jonqos bl-illustrazzjonijiet ikoniċi ta’ Frank Schembri.
Bla dubju s-suċċessun ta’ dan il-Milied. Spiċċa sold out fil-ħwienet tal-kotba kollha, u kien ir-rigal l-aktar mistenni għal dawn il-festi. Bellezza ta’ ktieb, li jaf jikkonfezzjona biss Trevor Żahra, b’kontribuzzjonijiet dwar il-Milied tradizzjonali Malti miktuba minn Carmel G. Cauchi, Jackie Mercieca, Fiona Vella, Joseph Vella Bondin, Alexander Vella Gregory u Żahra nnifsu.
Kieku kemm klassifika tal-iżjed picture book “gustuż” dan jirbaħ dejjem żgur! Ktieb bl-istampi dwar Mia, li tibża’ mill-klieb, sakemm darba …
Storja ta’ Claire Smedley, illustrazzjonijiet ta’ Romont Willy u traduzzjoni għall-Malti ta’ Claudia Gauci
Ir-rivelazzjoni ta’ dan il-Milied – rumanz ħelu immens, imisslek qalbek u perfett biex tqatta’ l-iljieli kesħin tal-Milied taqrah maġenb is-siġra. Id-debutt ta’ Ernest Vella fi storja maġika u atmosferika.
Iva, sewwa qrajtu. L-EWWEL każ tal-investigatur virtwali kult, Irvin Vella, anke dis-sena jsib ruħu fl-aktar għaxar kotba Merlin mibjugħa. Dan l-investigatur – frott il-pinna ta’ John A. Bonello – li flimkien mal-kuġini Luca u Laura jsolvi każ wara l-ieħor, kien beda l-karriera investigattiva tiegħu b’dan il-każ kumpless ġewwa dar antika fir-Rabat. Illustrazzjonijiet ta’ Lisa Falzon.
Ktieb ġdid ta’ Trevor Żahra DEJJEM iqabbad kurżità. B’mod speċjali dan, imbagħad, fejn għall-ewwel darba Żahra esperimenta bir-realtà miżjuda – l-augmented reality – li permezz tal-app Flint l-istorja letteralment tieħu l-ħajja quddiem għajnejk int u tgħin lill-Ispettur isolvi l-każ!
U naslu għat-“Top 3” … Suċċess meritat, l-ewwel rumanz ta’ Michael Cini mal-Merlin, l-istorja tat-twelid ta’ Ġesù imma rrakkuntata minn … ħmara: Sbejħa, il-ħmara li wasslet lil Marija sa Betlehem. Illustrazzjonijiet ta’ Josè Luìs Ocaña
Karattru ieħor ikoniku fil-letteratura Maltija għat-tfal, li ġenerazzjoni wara ġenerazzjoni jżomm intatt il-faxxinu tiegħu mat-tfal: Fra Mudest. U f’din is-sensiela ġdida, Charles Casha jwassal l-istejjer tal-Fra lil ġenerazzjoni ġdida ta’ tfal, b’addattament simplifikat u b’illustrazzjonijiet ġodda ta’ Deandra Scicluna.
U fl-ewwel post tal-kotba Merlin l-aktar popolari għall-2021, Simone Spiteri twassal l-ewwel avventura ta’ vvjaġġar fiż-żmien għal Maia u Alex fis-sensiela tal-Vinkulari. B’illustrazzjonijiet ta’ Moira Scicluna Zahra, dan l-ewwel rumanz jiftaħ is-saga tal-vinkulari u l-irwol tagħhom li jipproteġu ż-żmien.
Ritratt tal-paġna ta’ Leonard von Bibra fuq Unsplash
