Ġa t-toroq qed jimtlew b’qargħa ħamra, xemgħat, ħajt tal-brimb u fatati … u dak ifisser biss ħaġa waħda: li qed toqrob Halloween.

Min jaf għaliex festa “tal-biża’” tagħtina tant gost – probabbli għall-istess raġuni li nħobbu naraw il-films tal-orrur jew naqraw xi storja tal-biża’. Speċjalment mat-tfal, il-faxxinu tal-biża’ hu xi ħaġa primordjali. Imma naturalment mat-tfal hemm ftit ta’ problema: kif issibilhom stejjer tal-biża’ imma li ma jmorrux oltre ċertu limitu, u li jibqgħu addattati għalihom.

Fl-ixkafef tal-kotba għat-tfal bil-Malti hemm sensiela li toqgħod pinġuta għal dawn il-jiem: is-sensiela M…M…M…MIMLI MOSTRI. Fiha ħames kotba li anki minn isimhom biss idaħħluk fl-atmosfera ta’ Halloween:

L-Iskeletru
Il-Fatat
Il-Babaw
Is-Saħħara l-Kerha
Il-Vampir

Din is-sensiela, oriġinarjament mill-Katalunja u interpretata mill-ġdid bil-Malti minn Clare Azzopardi, hija miktuba b’sentenzi sempliċi, paragrafi qosra u tipa kbira — ideali anki għal dawk li forsi bil-Malti ma tantx iħobbu jaqraw.

Halloween taf tkun “l-iskuża” tajba biex lit-tfal iddewwaqhom ftit qari bil-Malti li se jieħdu gost bih … u għala le, forsi jibżgħu xi ftit ukoll 😉